د نشهیي توکو پر وړاندې مبارزه او د افغانستان امنیتي وضعیت د لیدنې مهم موضوعات وو
د افغانستان د کورنیو چارو وزیر خلیفه سراجالدین حقاني د اروپايي ټولنې له شارژدافیر نیکولا بیلومو سره په کتنه کې د دوه اړخیزو اړیکو پر پراختیا او د همکاریو پر پیاوړتیا خبرې کړې دي.
د کورنیو چارو وزارت د معلوماتو له مخې، حقاني نوموړي ته د خپلې دندې د پیل مبارکي ورکړې او د افغانستان او اروپايي ټولنې ترمنځ یې اړیکې مثبتې بللې دي.
په دې لیدنه کې د نشهیي توکو پر وړاندې د مبارزې او په دې برخه کې د نړیوالو مرستو پر دوام هم بحث شوی دی.
دواړو لورو د افغانستان د امنیتي وضعیت او د ګډو ګټو پر بنسټ د اړیکو د پراختیا پر اړتیا ټینګار کړی دی.
د کتنې پر مهال د متقابل تعامل او د همکاریو د دوام موضوع هم مطرح شوې ده.
د دې ډول لیدنو پایلې کولای شي د دواړو لورو ترمنځ د راتلونکو همکاریو پر څرنګوالي اغېز ولري.
سرچينه: شرق نيوز
