د امریکا ولسمشر ډونلډ ټرمپ د دغه هېواد د سنا مجلس پر هغې پرېکړې سختې نیوکې کړې چې له ایران سره د جګړې د محدودولو په موخه د یوې طرحې ملاتړ کوي.
ټرمپ په خپلې ټولنیزې شبکې «ټروت سوشل» کې لیکلي چې ایران یې تر سخت فشار لاندې راوستی و او د ده په وینا، تهران د شاتګ او امتیاز ورکولو ته نږدې شوی و، خو د سنا وروستۍ رایې ورکونې د امریکا مخالفانو ته د ځواک پیغام ورکړ.
د امریکا ولسمشر زیاته کړې چې د سنا مجلس د جنګي واکونو قانون په تړاو په ډېر نامناسب وخت کې رایه ورکړه او په دې سره یې د ده په وینا، «د ترهګرۍ تر ټولو ستر ملاتړي» ته دا پیغام واستاوه چې امریکا د ده له سیاستونو ملاتړ نه کوي.
ټرمپ ادعا کړې چې د سنا دغه اقدام له ایران سره مرسته وکړه او هغه یې ډاډمن کړ.
نوموړي همدارنګه ویلي چې څلورو جمهوري غوښتونکو سناتورانو له ډیموکراتانو سره په ګډه د دې طرحې ملاتړ وکړ او اوس ایران د امریکا له استازو پوښتنه کوي چې د دغې رایې معنا څه ده.
هغه ټینګار کړی: «د دغو سناتورانو اقدام زما دنده سخته کړه، خو زه به له هرې ممکنې لارې خپل ماموریت بشپړ کړم، ځکه چې زه تل خپل کار تر پایه رسوم.»

Discover more from sharq news global
Subscribe to get the latest posts sent to your email.

