د افغانستان کرېکټ بورډ اعلان کړی چې د شپږیزې کرېکټ لیګ په ترڅ کې به د خوست ولایت په رحمت ولي مسرور کرکټ لوبغالي کې د اوزبیکستان د ملي کرېکټ لوبډلې کوربه توب وکړي.
دا شل اوریزه لوبه به د جولای په ۱۰مه نېټه د سهار په ۹:۰۰ بجو د یوولسم پړاو د شپږیزې لیګ د سیالیو په لړ کې ترسره شي او د هېواد دننه او بهر به د بېلابېلو تلویزیوني او ډیجیټلي رسنیو له لارې په ژوندۍ بڼه خپره شي.
دا سیالي د افغانستان کرېکټ بورډ او د اوزبیکستان د کرېکټ فدراسیون ترمنځ د همکارۍ د هغه تړون پر بنسټ ترسره کېږي چې د ۲۰۲۵ کال په وروستیو کې لاسلیک شوی و.
د کرېکټ بورډ د اجراییوي رییس په وینا، افغانستان هڅه کوي د نويو او مخ پر ودې هېوادونو د کرېکټ ملاتړ وکړي او خپلې تجربې او تخنیکي وړتیاوې ورسره شریکې کړي.
له دې وړاندې هم د اوزبیکستان د توپ اچوونکو لپاره په افغانستان کې ځانګړي روزنیز کمپونه او د مهارت لوړونې پروګرامونه جوړ شوي دي، او د ظرفیت لوړونې په چوکاټ کې یو شمېر ورکشاپونه هم ترسره شوي دي.
د افغانستان کرېکټ بورډ ویلي چې د افغان یوولس کسیزې لوبډلې بشپړ نوملړ به وروسته اعلان شي.
راپور : مسعود عربزی
