د امریکا او ایران ترمنځ د بریدونو له درېدو وروسته نن دوشنبه په نړیوالو بازارونو کې د تېلو بیې د پام وړ راټیټې شوې. د برېنټ خامو تېلو بیه نږدې پنځه سلنه کمه شوې او د یوه بېرل بیه شاوخوا ۹۲ ډالرو ته رسېدلې ده، حال دا چې د وروستیو نښتو پر مهال له ۱۰۰ ډالرو هم اوښتې وه.
راپورونه وايي، امریکا د ایران پر ضد د پوځي عملیاتو له پراخولو ډډه کړې او ایران هم د خپلو انتقامي بریدونو د درولو خبر ورکړی. همداراز د دواړو هېوادونو ترمنځ د ډیپلوماتیکو خبرو د بیا پیل هڅې روانې دي، چې د تېلو بازارونه یې د یوه احتمالي اوربند په تمه کړي دي.
بلخوا، ایراني رسنیو خبر ورکړی چې د یکشنبې او دوشنبې په ورځو د ایران په جنوبي اوبو کې دوه بېړۍ له پېښو سره مخ شوې، خو دا راپورونه لا تر اوسه په رسمي ډول نه دي تایید شوي.

Discover more from sharq news global
Subscribe to get the latest posts sent to your email.

