واشنګټن، جمعه، د نومبر ۲۰مه، ۲۰۲۶ | ۲۹ عقرب ۱۴۰۵
د امریکا مرستیال ولسمشر جيډي ونس د جمعې په ورځ په سپینه ماڼۍ کې په یوه خبري کنفرانس کې له دې ویلو ډډه وکړه چې که پرېکړه یې په لاس کې وای، پر ایران به یې د ولسمشر ډونالډ ټرمپ په څېر د برید امر کړی وای.
ونس، چې د ټرمپ تر څنګ ولاړ و، وویل چې په فبرورۍ کې پر ایران د برید پرېکړه د ټرمپ وه او «زما دنده د امریکا د ولسمشر ملاتړ دی». ټرمپ له ونس غوښتي وو چې ووايي بریدونه اړین وو او هغه به یې هم کړي وای، خو ونس له دې ویلو ډډه وکړه.
ټرمپ یو ځل بیا له خپلې پرېکړې دفاع وکړه او ویې ویل چې که بېرته تېر ته ولاړ شي، بیا به هم هماغه پرېکړه وکړي. ټرمپ وویل چې د ونس له دریځه ناراضه نه دی، خو په باور یې ونس باید د بریدونو اړتیا ته اشاره کړې وای.
ونس تر دې وړاندې د کانګرس په منځمهاله ټاکنو کې د جمهوري غوښتونکو تر سختې ماتې وروسته لیکلي وو چې «زموږ د ماتې لامل جګړه وه». کله چې په کنفرانس کې له هغه وپوښتل شول چې ایا د ایران جګړه د دې ټاکنیزې ماتې ارزښت لري، هغه په ښکاره د پوځي عملیاتو تایید ونه کړ، خو ویې ویل چې د ایران د اټومي وسلې د ترلاسه کولو مخنیوی بالکل اړین هدف دی او ایران د ترهګرۍ تر ټولو لوی ملاتړی دی.
ونس په وروستیو میاشتو کې له ایران سره د جګړې د پای ته رسولو لپاره د واشنګټن د دیپلوماتیکو هڅو له اصلي څېرو څخه و، خو ټرمپ د هغه تر ټاکنیزو نیوکو وروسته له هغه وغوښتل چې خپل تمرکز د امریکا پر کورنیو مسایلو وکړي.
سرچینې: Reuters، BBC Persian
Discover more from sharq news global
Subscribe to get the latest posts sent to your email.

