د اسټرالیا د کرکټ مخکښ توپوهونکی سټیو سمیت وايي، لا یې پرېکړه نه ده کړې چې تر ۲۰۲۷ کال پورې به په ټېسټ کرکټ کې پاتې شي او که نه.
سمیت، چې د اسټرالیا د ټېسټ لوبډلې له مهمو او تجربهکارو لوبغاړو څخه دی، څرګنده کړې چې د خپل ټېسټ راتلونکي په اړه به له هرې لړۍ وروسته وضعیت ارزوي او له مخکې څخه د خپلې تقاعد نېټه نه ټاکي.
د نوموړي په وینا، د ټېسټ کرکټ په اړه به د راتلونکو سیالیو، خپل فزیکي حالت او د لوبو له فشار سره سم تصمیم نیسي. هغه ټینګار کړی چې تر اوسه یې د اسټرالیا او انګلستان ترمنځ د ۲۰۲۷ کال ټېسټ سیالیو پورې د لوبېدو په اړه وروستۍ پرېکړه نه ده کړې.
د سټیو سمیت پاتې کېدل د اسټرالیا لپاره مهم بلل کېږي، ځکه نوموړی د دې لوبډلې د ټېسټ کرکټ له تر ټولو اغېزناکو توپوهونکو څخه دی او د اوږدې مودې راهیسې د اسټرالیا د منځنۍ کرښې مهمه برخه جوړوي.
د کرکټ شنونکي باور لري چې که سمیت تر ۲۰۲۷ کال پورې په ټېسټ لوبو کې پاتې شي، د اسټرالیا د لوبډلې لپاره به د انګلستان پر وړاندې په دغو مهمو سیالیو کې د تجربې له پلوه د پام وړ مرسته وي.
سرچینه : شرق نیوز
